දිවයිනේ නිරිත දිගින් පිහිටා ඇති සබරගමුව පළාත විශාලත්වය අතින් 8 වන ස්ථානය ගනී. විශාලත්වය ව.කි.මී 4968කින් සමන්විත වන අතර, පළාත දිවයිනේ සමස්ත ගොඩබිම් ප්‍රමාණයෙන් 7.6%කට හිමිකම් කියයි. සබරගමුව පළාත රත්නපුර සහ කෑගල්ල යන ප්‍රධාන පරිපාලන දිස්ත්‍රික්කයන්ගෙන් සමන්විත වේ. සබරගමුව පළාත රත්නපුර සහ කෑගල්ල යන ප්‍රධාන පරිපාලන දිස්ත්‍රික්කයන්ගෙන් සමන්විත වේ. රත්නපුර දිස්ත්‍රික්කය විශාලත්වයෙන් ව.කි.මී 3275ක් වන අතර, දිවයිනේ සමස්ත භුමි ප්‍රමාණයෙන් 5% ක් ඊට අයත්ය.

ඊට සාපේක්ෂව කෑගල්ල දිස්ත්‍රික්කය ව.කි.මී 1693කට හිමිකම් කියන අතර එය දිවයිනේ සමස්ත භූමි ප්‍රදේශයෙන් 2.6.%ක් පමණි. පරිපාලන ව්‍යුහය පිළිබඳ සැලකීමේදී රත්නපුර දිස්ත්‍රික්කය ප්‍රාදේශීය ලේකම් කොට්ඨාශ 18 කින්ද කෑගල්ල දිස්ත්‍රික්කය ප්‍රාදේශීය ලේකම් කොට්ඨාශ 11කින්ද සමන්විත වේ.. වාර්ෂික සාමාන්‍ය වර්ෂාපතනය රත්නපුර සහ කෑගල්ල දිස්ත්‍රික්කවල පිළිවෙලින් මිලි මීටර් 2000-3360 සහ මිලි මීටර් 2500-3000 අතර ප්‍රමාණයකි. මෙවැනි වර්ෂාපතන පරාසයක මෙම පළාත පිහිටීම නිසා ශ්‍රී ලංකාවේ පවතින සියලුම දේශගුණික තත්වයන් මෙහි දක්නට ලැබේ.

ඒ අනුව උඩරට, මැදරට හා පහතරටට විශේෂිත වූ බෝග වර්ග මෙම පළාත තුළ වගා කිරීමේ විභවතාවයක් පැවතීම විශේෂත්වයකි. පළාතේ වෙසෙන මිලියන දෙකක පමණ ජනගහනය අතරින් 70%ක් පමණ ග්‍රාමීය ප්‍රදේශවල ජීවත්වන අතර යැපුම් කෘෂිකර්මාන්තය ඔවුන්ගේ ප්‍රධාන ජීවනෝපායයි. ඒ අතරින් වැඩි ප්‍රතිශතයක් වී ගොවිතැන සඳහා යොමු වී ඇත..

සබරගමුව පළාත තුළ වී වගාව ප්‍රධාන වශයෙන් මහා වාරි පද්ධති, සුළු වාරි පද්ධති සහ වර්ෂාපෝෂිත මගින් පෝෂණය වේ. දිස්ත්‍රික්ක වශයෙන් ගත් කළ රත්නපුර දිස්ත්‍රික්කය තුළ කුඩා වැව් පද්ධති 116ක්ද ඇළ මාර්ග 1777ක්ද අමුණු 895ක් ද පවතී. එමෙන්ම කෑගල්ල දිස්ත්‍රික්කය තුළ කුඩා වැව් පද්ධති 29 ක්ද ඇළ මාර්ග 1383ක්ද අමුණු 1759ක්ද පවතී. මෙම සුළු වාරිමාර්ග පද්ධති ගොවිජන සේවා දෙපාර්තමේන්තුව යටතේ පවතින අතර එම ව්‍යාපෘති සංවර්ධනය හා නඩත්තුව 13 වන ආණ්ඩුක්‍රම ව්‍යවස්ථා සංශෝධනය අනුව සබරගමුව පළාත් සභාවේ පළාත් ඉඩම් කෘෂිකර්ම අමාත්‍යාංශය යටතේ සිදු වේ.